Design a site like this with WordPress.com
Spring weg

Kom ons praat slaaie

Ek hou daarvan om kos vooruit te maak. Dit is my reddingsboei, veral as ek weet dat daar ‘n woeste tyd aankom en ek so besig gaan wees en moeg gaan word en dan na enige verkeerde ding gaan gryp.
So tans, met die oog op vakansie wat voorlê en daar gepizza, gehamburger, gebrood en gehotdog word en allerhande ander verkeerde kos gegryp word, moet daar genoeg gaar kos in die vrieskas wees vir my om te eet. Daarom maak ek heelwat vleisgeregte vooruit. Die Kersfeeskos is reeds gaargemaak in die sonoond, veral noudat die son so skyn en ons nie altyd verseker is van ons elektrisiteit nie. Maar ek maak ook ander vleiskosse gaar, soos Frikkadelle.

Ek maak selfs slaaie in grootmaat, maar darem nie noual nie. Ek sal bv ‘n groot Kool- en appelslaai (Toortsie 1) maak wat ‘n paar dae hou. Of die blomkoolslaai (Toortsie 1) wat net soos aartappelslaai smaak. Ek het lank laas die wortelstolslaai (Toortsie 1) gemaak, maar stolslaaie werk fantasties. Dit lyk mooi en hou ‘n hele paar dae.

Die Kool en Tunaslaai (Toortsie 1) is net so lekker en vars om sommer gou vinnig te maak en almal dan heerlik kan eet aan iets vars en gesonds. Dieselfde met die Tunaslaai vir een persoon (Toortsie 1).

Toortsie 2 het net sulke lekker slaaie. Dis nou appelkoostyd. Maak die soetsuur appelosies. Dis heerlik. Die marmerstolslaai is ook lekker. Die eierslaai (T2) is ook heerlik en tipies banting. Die kool en wortelslaai (T2) is ook lekker en hou ‘n paar dae, dus een keer se moeite vir baie keer se eet en iets wat reg staan in die yskas as die honger skielik knaag. Die peerslaai (T2), is baie lekker, maar ek dink nie dit sal ‘n paar dae hou nie. As mens die lagieslaai maak (T2) sonder die tamatie behoort dit ook 2 dae te hou. Die botterskorsieslaai (T2) is iets besonders vir saam met ‘n braaivleis.En die bessieslaai (T2) smaak soos poeding.

Ek hou natuurlik baie daarvan om slaaie in te lê en reg te hê vir enige oomblik se gebruik, veral as daar skielik gaste opdaag. Die Ingelegde kerrieboontjies en die Ingemaakte uieslaai (Toortsie 3) is absolute wenners in enige koskas. Daar is nog ‘n koolslaai in T3 en ‘n lieflike aarbeislaai, beslis iets anders as die normale mengelslaai. En as jy regtig iets anders wil maak, probeer gerus die gevulde avoslaai in Toortsie 3.

En broccolislaai gee aan broccoli ‘n heel nuwe baadjie. Daar is ‘n baie lekker een in Toortsie 1, en in T3 ‘n kerriebroccolislaai wat net so lekker is. En natuurlik het Toortsie se vars slaai (T3) ook ‘n kinkel in.

Sjoe! Dit was goed om self ‘n bietjie deur my boeke te blaai. Ek gebruik my boeke regtig daagliks, maar blaai so maklik na dieselfde reseppies wat ek altyd gebruik. Ek dink ek moet sommer NOU Checkers toe ry en gaan uie koop om in te lê!

Praat met my as jy belangstel in van die boeke of graag wil deel wees van ons Bantinggroep wat mekaar opbou en ondersteun.

Toortsie

Toespraak by Damestee

Weer eens hello en baie dankie vir ‘n wonderlike voorreg om hier te kan kom praat vandag. Ek voel regtig geëerd!

Dit was nooit in my wildste drome een van die goed wat ek gevisualiseer het dat ek by plekke sal praat nie. Ek bedoel, praat kan ek baie, maar om toesprake te lewer nie. Maar dis ook deel van hierdie verrassende reis waarmee ek besig is. 

Hierdie Bantingding het ek nie loop soek nie, dit het oor my pad gekom. En ek is soos ‘n klein dogtertjie wat huppel in ‘n bospaadjie – gelukkig en onspanne. Ek en my ouers het kom piekniek maak en terwyl hulle rus kan ek ‘n bietjie rondkyk en lekker verrassings om elke hoek en draai kry in die wete dat ek veilig is, want hulle is naby. Geen beplande, uitgewerkte pad nie, maar ‘n pad wat ek net móét huppel en dit wat ek sien en wat gebeur, net geniet. 

In 2014 was ek moedeloos. 

Ek het al geweighless en geweight watchers en ongelooflik maer geword, net om die oomblik wat ek beheer verloor, alles op te tel en met rente. 

Toé was ek obese. Vetsugtig. En my gewig het daagliks toegeneem. Ek het alles geëet wat voorkom en het nie opgehou voor ek nie voel of ek bars nie. Al my klere het ongemaklik gesit. Niks het gepas nie. Dit het my behoorlik gewurg. 

Toe bid ek dat God my moes help, want ek weet nie meer nie. 

En Hy stuur vir my die Saterdagaand vriende wat by ons kom eet, wat daardie week begin Bant het. Ek het hulle daardie aand alles uitgevra en nadat hulle weg is, Tim Noakes se boek gekoop en die Sondagoggend het ek begin Bant op Struisbaai met letterlik niks bantingkos in my huis nie. Daar was ‘n stukkie ouerige botter, twee eiers wat nie meer so vars was nie en swak kwaliteit wors wat iemand in my vrieskas vergeet het. 

My hele lewe het verander daarvandaan. 

So het die een boek na die ander gekom. Want op daardie stadium was daar nie oulike bantingresepte op die internet nie. Of dit wat daar was, was eintlik onuitvoerbaar of nie lekker nie. Oorsese resepte.Ook nie eintlik hulp en raad nie. Of ek het nie geweet waar om te soek nie. Dit was of ek in ‘n oerwoud was en my pad moes oopsukkel. 

Ek het verlede jaar die Banting Coach kursus by Nutrition Network gedoen. Nie omdat ek ‘n coach wil wees nie, maar eintlik net vir die tjap ter wille van my boeke. Sodat ek kan sê dat ek ‘n coach is. Vir kredietwaardigheid. 

Ek wou my nie laat bind deur ‘n groep hier op die dorp te begin nie, ek is net te veel weg. 

Maar in Januarie vanjaar kry ek eensklaps die idee om ‘n Bantingkompetisie te hou. In die kwessie van ‘n minuut het ek presies geweet wat ek moes doen en hoe dit moes wees. So asof dit in my kop neergesit is. Volledig uitgewerk. Dit sou ‘n whattsappgroep wees, so dit maak nie saak waar ek is of ek direkte kontak met die mense het nie. 

Ek het gehoop dat daar 3 sou deelneem. Ek is tog nie ‘n tydskrif of TV-persoonlikheid nie, waarom sal mense by my inskryf? Maar hulle het, en op 1 Februarie vanjaar het 25 mense begin en die leefstyl begin aanleer, mekaar bemoedig, mekaar help, gewig verloor, gesond word. 

Ek kyk nie net na die mens se gewig nie, maar is by die volle mens betrokke – liggaam, siel en gees. Mense vertel vir my hulle stories. Ons vat mekaar se hand en trek mekaar op. 

Intussen is die kompetisie al lankal verby, maar die groep hou steeds aan. Daar kom amper weekliks mense by en daar is noual omtrent 50 deelnemers. Ons ondersteun mekaar, gee raad, deel resepte uit. 

Vandat ek die groep het, het ek geweldig baie geleer en gesien. Behalwe natuurlik die gewig wat die mense verloor, is vir my die grootste geskenk die gesondheid wat hulle herwin. Mense raak gesond van siektes wat ek nie eers geweet het bestaan nie. ‘n Vrou wie se lewe deur pyn beheer is as gevolg van ‘n outo-immuunsiekte, het binne ‘n week nie meer pyn gehad nie. Mense se bloedsuiker is skielik onder beheer, hulle bloeddruk normaliseer. Dis net ongelooflik!

Dit bring my by diabetes. Nutrition Network spesialiseer in diabetes. Die kursusse wat ek by hulle doen, se hooffokus is diabetes. 

Want vandat die dieetriglyne in die 1960’s verander het van ‘n hoë vet na ‘n lae vet dieet en meer koolhidrate, het diabetes wêreldwyd met rasse skrede toegeneem. 

Diabetes is ‘n krisis en mense kry dit op ‘n al hoe jonger ouderdom. Kinders is oorgewig en word op ‘n vroeër ouderdom siek. 

Kyk ‘n bietjie na foto’s van die 1970’s, vroeg 1980’s. Daar was nie eintlik vet mense nie!

Die ding is, ons het regtig nie suiker en stysel in ons dieet nodig nie. Dit is ‘n DRUG, is uiters verslawend en dit maak ons siek. Dis meer verslawend as kokaïn. 

Elke keer wat ons koolhidrate inneem, skei ons pankreas insulien af. En as ons koolhidrate eet, word ons baie gouer weer honger. Dan eet ons weer. En dan skei ons pankreas weer insulien af. 

Op die ou end raak ons insulienweerstandig, want ons liggame kan nie al die insulien wat ons afskei hanteer nie. So, die selle koes letterlik vir die insulien en neem dan nie die insulien op wat nodig is om die oormaat suiker in ons bloed te verwerk nie. 

Ons kry hyperinsulemia – ‘n geval van te veel insulien in ons bloed. 

En ons bloedsuiker styg en ons kry diabetes. 

En diabetes lei tot hartaanvalle. 

Diabetes steel van ons. Dit beïnvloed ons oë. Dit laat ons ledemate verloor.

Insulien stoor ook die oormaat energie in die vorm van vet. En hierdie vetlaag om ons lyf is eintlik ‘n insulientjoepie. 

Wanneer ons dan soos met Banting ophou om suiker en stysel te eet, skei ons nie meer die baie insulien af nie. Ons verhoog ons vetinname en eet lekker ryk kosse. 

Ons begin om Ketose af te skei. En ketose weet wat om met vet te maak. 

Ons raak vetverbranders in plaas van suikerverbranders. 

Ons bloedsuiker normaliseer en ons raak maer, energiek, gesond. En minder honger. 

Sedert ek met Banting begin het 8 jaar gelede, het my hele lewe verander. Ek is meer energiek as ooit. Ek is gesond. Ek het nie besef hoe siek ek was nie, ek was reeds ‘n diabeet. Ek was insulienweerstandig. Het Metaboliese Sindroom gehad. Ek is aan suiker verslaaf, maar beheer die verslawing. Vandag is ek gesonder as ooit. 

Alles danksy ‘n kopskuif rondom kos. 

Suiker hijack jou brein. 

As jy oorgewig is, vetsugtig, obese, maak dit nie van jou ‘n slegte mens nie. Nee, jy is steeds die wonderlike mens wat God jou gemaak het. Al probleem wat jy het, is dat jy dalk verkeerde koskeuses maak. 

Dalk weet jy nie beter nie, want die verkeerde koskeuses word aan jou verkoop deur die media en al wat leef en beef. Dalk het jy net iemand nodig wat jou kan help om die regte koskeuses te maak. Dalk het jy net nodig om by my groep aan te sluit as jy sou wou. Sodat ander jou kan help as jy struikel.  

Maar dit is jou lewe, jou keuse. Elke persoon doen dit vir homself en as jy verkies om dit nie te doen nie, is dit heeltemal reg met my. Ook as jy verkies om eerder suiker te eet. 

Die groep kos R750 eenmalig en dan kry jy die 3 Toortsies daarmee saam.

Intussen huppel hierdie dogtertjie voort op die onbekende paadjie en is sy opgewonde oor elke verrassing wat God nog op haar pad gaan bring. Soos hierdie verrassing om genooi te word om ‘n groep mense toe te spreek. Ek weet nie wat voorlê nie, maar Hy weet en dít is vir my genoeg. Al wat ek moet doen is om hierdie pad in gehoorsaamheid en vertroue te stap. Doelgerig, om Sy Naam te eer. 

Nogmaals dankie vir hierdie geleentheid. 

Mag dit met elkeen van julle baie goed gaan.

Toortsie

Aan Bantingnuwelinge

Het jy besluit om die Banting (Keto) – leefstyl te volg? Hartlik geluk! Dit is een van die beste besluite wat jy nóg kon neem rondom jou gesondheid.

Ek wil jou sommer van die eerste oomblik af aanraai: Konsentreer op die reis. Op dit wat jy gaan leer. Op jou gesondheid wat jy gaan verbeter.  

Weeg altyd in dieselfde klere indien moontlik, in die oggend voor jy geëet het en met kaalvoete op dieselfde skaal. 

My vraag vandag aan jou: Hoe gaan dit met jou? Met jou gemoed? Hoekom wil jy graag Keto doen? Wil jy dit van dag 1 af voluit doen of wil jy dit rustiger vat en oor tyd dit infaseer?

‘n Baie oulike pediater by ons kursus het dit as volg aanbeveel vir die mense wat dit rustiger wil vat:

Stap 1: Probeer om alle koolhidrate uit jou drinkgoed te sny.

Stap 2: Haal alles ‘waarop’ jy kos sit, weg – die pasta, die rys, die brood en eet net dit wat bo-op kom.

Stap 3: Haal die suiker en stysel uit jou snacks uit. Geen tjips, tjoklits, ens meer nie. 

Stap 4: Nou geen rooilysitems meer nie – ook nie in jou kos nie.

Stap 5: Probeer om nie meer tussenin te eet nie.

Stap 6: Probeer slegs 2 keer per dag te eet.

Kom aan die beweeg.

Drink jou water. 

Neem sout in. Selfs net ‘n knippie sout op jou tong. Sout help vir die onttrekkingsimptome.

Hierdie week probeer hulle wat dalk nie nou al so alles wil uitsny nie, net met die drinkgoed. Nie meer suiker in jou koffie en tee nie. Verkieslik nie alkohol nie, maar as jy voel om steeds soms ‘n bietjie wyn te drink, nie meer as een glasie per dag nie. Koop vir jou kruietees wat jy sonder melk en suiker drink. Vervang die melk in jou koffie met room. 

Onthou dat as jy skielik alles los, jy vir ‘n paar dae baie sleg mag voel. Dit is normaal. Dis dan wat die bietjie sout baie help. 

Watter tipe oefening klink vir jou in jou lyn? En hoeveel? Jy hoef nie die dam onder die eend uit te ruk nie, net matige oefening en as jy alreeds oefen, hou net daarmee vol. 

Begin deur dit so eenvoudig as moontlik te maak: Maak ‘n vleis met groente vir etes. Eet soveel eiers soos wat jy wil met ‘n stukkie tamatie en komkommer. Begin leer solank die lyste sodat jy kan sien wat jy mag en nie mag eet nie. 

Rooi lys – glad nie; Oranje, net beperkte hoeveelhede, groen soveel soos wat jy graag wil eet. Lyste agterin my boek 3.

Eet wanneer jy honger is en hou op wanneer jy versadig is.

En onthou, vet is jou vriend! Veral dierevet.  

Hierdie is ‘n uittreksel uit die eerste boodskap wat ek vir nuwe deelnemers by ons Bantinggroep stuur. Ons groep kommunikeer in Afrikaans en per whattsapp. Ons ondersteun mekaar, gee mekaar raad, is sag met mekaar. Ons byt nie mekaar se koppe af of vergruis mekaar as ons sou struikel nie. Ons hou mekaar se hande vas en help mekaar om die nuwe leefstyl aan te leer.

Want ons verstaan wat dit beteken om te smag na suiker of stysel, na kosse wat so lekker lyk en is, maar ons siek maak. Ons leer mekaar ons kosgeheime en om ander kosse te maak wat selfs nog lekkerder is as dit wat ons nie meer wil eet nie.

Ons is tans ongeveer 50 in die groep. Nie almal is aktief nie. Soms val een dalk uit die bus uit en klim later weer op. Ons is ook daarmee gemaklik.

Nuwe lede is altyd welkom. Die koste is R750 eenmalig en dit sluit al drie die Toortsieboeke in.

Toortsie

Banting/Keto E-book for free!

Special offer! Fifty people can download the e-book, Toortsie’s Banting Bash! for free! Get yours today! Use the coupon number, TF45D for your free copy.
Once the first 50 copies are downloaded, they are on sale for $5, or R80. It can be downloaded in all formats at Smashwords.com.
Toortsie’s Banting Bash is also available as a printed book at madeleburger@gmail.com. Feel free to contact me.

Download it HERE: https://www.smashwords.com/books/view/1081230

Toortsie

Nog ‘n jaar is verby

So het 27 Julie weer eens gekom, 8 jaar nadat ek op ‘n Sondagoggend met letterlik geen Bantingbestanddele in die huis, besluit het om dit te waag om dit te doen. Want ek was oorvet. Oormoedeloos. My klere het ongemaklik gesit. Ek het vet gevoel. En al die baie ander diëte wat ek gevolg het, kon my nie meer help nie. In die verlede het ek nog altyd goed verloor op sulke diëte, maar toe nie meer nie. My gewig het buite beheer daagliks meer geword. En ek wou net eet en eet en eet. Want ek was honger. En lus vir kos al was ek dalk nie honger nie.

Daardie Sondagoggend op Struisbaai was daar twee nie meer so vars nie eiers in die yskas en ‘n pakkie baie swak, onsmaaklike boerewors wat iemand daar vergeet het in die vrieskas. Dis al.

Maar daardie Sondagoggend het ek die besluit geneem: Hierdie sal die laaste keer wees wat ek met ‘n dieet begin. Ek sal moet volhou hiermee en ek mag nie kyk hoe ek die dieet kan ‘wen’ nie. Wel, by tye hét ek meer in die oranjelys geboer as wat veronderstel was en het ek die vrot vrugte daarvan gepluk. Maar, sodra ek weer konsentreer en die slegte gewoontetjies wat soms ongemerk ingesluip het, los, was alles weer mooi op dreef.

27 Julie 2014 het ek nie geweet watter reis vir my voorlê nie. Kort vóór dit het ek in desperaatheid gebid: “Here, help my asseblief met my gewig!” Hy het! En ek? Ek is die ou klein dogtertjie wat heerlike en ontspanne in die bos huppel terwyl my Vader sorg en is heerlik verras met alles wat in die pad verskyn. Soos drie resepteboeke (wie sou dit nou ooit kon dink?) … soos gesondheid … ‘n Whattsapp Bantinggroepie.

As ek nie daardie dag daardie besluit geneem het nie, was ek nou nog op sekere medikasie. Sou ek nou al vir jare diabetesmedikasie gebruik het. Was ek seker al depressief van nie meer weet watter kant toe nie. Danksy my besluit destyds is ek gesond. Kry ek nie meer megraine nie. Is my bloedsuikervlakke op ‘n normale manier onder beheer. Kry ek nie meer ‘brainfog’ nie. Ag, ek weet nie eers wat alles nie.

Ek het 17 kg afgeskud en behou dit ná al die jare. Skielik het ek ‘n kas vol klere, want klere raak nou oud in my kas omdat dit steeds pas.

Dit was die beste besluit nóg wat ek kon doen in verband met my gesondheid.

Before
After

Kyk gerus HIER indien u meer van my skrywes oor die keto-leefstyl wil lees.

Toortsie

Nie alles wat sê ‘Low Carb’ …

Nie alles wat sê, Low Carb, is Low Carb nie. Daarom is dit so belangrik dat, as ons die LCHF leefstyl (Banting, Keto) volg ons dit moet ken en presies moet weet wat ingesluit is daarby en wat nie. Want as ons nie die lyste van kosse ken nie, kan ons maklik om die bos gelei word.

Daar is baie kansvatters daar buite wat net ‘n geleentheid aangryp om geld te maak en nie sal huiwer om iets as Keto/Banting/Low Carb te merk terwyl dit bestanddele bevat wat nie toelaatbaar is nie. En niksvermoedende mense koop dit net omdat daar Keto op staan. Dit is die rede hoekom ons ook moet lees agterop ‘n botteltjie of pakkie: Wat is die suikerinhoud, maar meer nog, watter bestanddele is daarin. Is dit Regte Kos, of is dit chemies vervaardigde gemors wat ‘n NUL koolhidraat aantoon, maar wat regtig ook nie gesond is nie.

Ek het al twee sogenaamde Low Carb (Banting) resepteboeke gekoop wat regtig NIE in daardie kategorie behoort te val nie. Die een was lank gelede en dis deur ‘n bekende tydskrif uitgegee. Daar was die lieflikste resepte in, maar ongelukkig was daar allerhande verbode bestanddele ook in. NOu het ek weer ‘n pragtige resepteboekie met 500 ‘low carb dishes’ gekoop op ‘n uitverkoping vir slegs R20. Groot was die teleurstelling dat resepte SUIKER, sonneblomolie, AFGEROOMDE melk, VOLGRAANMEEL, heuning, lemmetjiesap, sojamelk, hawermoutpap, crispbread, rysnoedels, sojasous, kekerertjies, laevet maaskaas, ens bevat. En nie net in een resep nie. IN ELKE LIEWE RESEP!

Om die waarheid te sê, ek weet nie waar die persoon haar inligting vandaan gekry het om enigsins te dínk dat hierdie resepte in die Low Carb kategorie val nie, en meer nog, dat dit uitgewers nie hulle huiswerk behoorlik gedoen het om so ‘n boek uit te gee wat eintoik totale vals inligting versprei nie. En dit is ‘n baie bekende uitgewer in ons land! Ek voel dis skandalig om mense so om die bos te lei en geld uit hulle te maak.

Om Banting/Keto/Lae koolhidraat resepte uit te gee verg groot uitdagings. Dit is sommer net ‘n geval van dat jy een bestanddeel vervang met iets anders nie. As jy een bestanddeel uithaal, volg ‘n hele reeks veranderinge. Byvoorbeeld as jy meel uithaal, hoe maak jy iets styf? Of hoe bak jy dit? Dit is ‘n wetenskap op sy eie en iets wat vir my steeds ‘n groot uitdaging inhou, veral as jy iets wil bak en ‘meel’ gebruik.

Tussen die 500 resepte in hierdie boekie, is daar wel ook lieflike goed wat ‘n mens dalk net so sal kan maak of ‘n bietjie moet aanpas om dit wel Keto-vriendelik te maak. Ek hoop maar net dat almal wat dit koop, dit met wakker ogies sal hanteer.

Daarom my waarskuwing: Lees asseblief die etikette. KYK of iets wat Lae Koolhidraat gemerk is, wel kwalifiseer voor jy dit koop. Baie Lae koolhidraatstafies bevat steeds suiker, of dadels, of stysel …

Kyk gerus HIER indien u meer van my skrywes oor die keto-leefstyl wil lees.

Toortsie

Stres en gewigsverlies

Wanneer ‘n mens stres, skei jou liggaam glukose af wat jou gewigsverlies belemmer. Wel, en as jy enigsins ‘n emosionele eter is (soos ek), raak jy aan die kou sodra jy gespanne raak en eet jy al wat voorkom – dit wat reg is en ook wat nie goed is vir jou nie. Om die waarheid te sê, het jy ‘n geneigdheid om sulke tye juis te wil gryp na suikers en tjips en lekkers.

Daarom is dit belangrik om te kyk na wat jou stresvlakke opjaag. Kan jy dalk iets daaraan doen? Is daar dinge op jou program wt jou geluk stel en bydra tot ‘n stresvolle lewe? Is dit moontlik om af te skaal?

Watter saadjies van bitterheid het jy dalk toegelaat om wortel te skiet? Vir wie wil jy nie vergewe nie? Dink daaroor – wat gaan gebeur as ek dit laat gaan? Wat gaan gebeur as ek die persoon vryspreek?

Die waarheid is – deur iemand vry te spreek, deur doelbewus te kies om die persoon te vergewe, spreek jy nie net daardie persoon vry nie, maar kom jy ook vry. En om die persoon keer op keer te vergewe, elke keer wat die kwaad weer kom, raak jy vryer en vryer. Jou hart ligter en ligter. Gesonder en gesonder. Skei jou liggaam minder glukose af.

Ja, as jy wil gewig verloor, help dit nie net om te kyk na wat jy eet en jou oefening nie. Om suksesvol gewig te verloor moet jy na die hele jy kyk. Dat die hele jy gesond raak. En dán sal jy meer moed en krag hê om die onmoontlike aan te pak.

Sterkte!

Kyk gerus HIER indien u meer van my skrywes oor die keto-leefstyl wil lees.

Ek wil jou graag uitnooi om deel te word van ons Banting (Keto) whattsappgroep. Ons kommunikeer in Afrikaans. Ons indersteun en help mekaar om die leefstyl goed aan te pak.

Toortsie

Atkins

Dr Atkins New Diet Revolution

Ek lees tans bogenoemde boek na aanleiding van Prof Tim Noakes se verwysing daarna. Hy verwys daarna tydens sy verhoor destyds nadat hy by die Mediese Raad aangekla was oor raad wat hy vir iemand gegee het rondom babavoeding. Terloops, hy is onthef van al die aanklagte. En het jy geweet dat hy as wetenskaplike in die Mediese lyn 3e in Suid-Afrika en 1240e op die wêreldranglys is?

Terug by die boek: Dr Atkins New Diet Revolution. Wat ‘n lieflike boek! Ek het altyd gedink dat Atkins eerder konsentreer op proteïene terwyl keto op vette konsentreer. Wat seker waar is. Maar as jy die boek lees, is daar soveel ooreenkomste en soveel te leer. Hy antwoord sommer ‘n klomp vrae wat ek nog in my hart het.

Hy noem dat as jy vir langer as 4 weke ‘n plato bereik het, jy ernstig moet kyk na wat jy eet. Het jy nie dalk ongemerk weer meer koolhidrate begin inneem nie? Oefen jy genoeg? Moet jy nie ‘n bietjie sny op alkohol nie? Dalk moet jy melk en selfs koffie vir ‘n ruk uitsny? Neute vir ‘n ruk vermy as jy glad nie gewig verloor nie. Net groen groentes eet om weer aan die gang te kom. Natuurlik altyd jou proteïene met vet aan. Vetter snitte vleis.

Hy noem ook dat party mense ‘n groter metaboliese weerstand het. Dit veroorsaak dat jy moeiliker gewig verloor. Die antwoord? Eet nóg minder koolhidrate. En soos wat ek soveel keer vir my groeplede sê wat dalk sukkel om die gewig af te gooi: Daar is eers metaboliese herstelwerk wat gedoen moet word. Moenie ontmoedig voel as jy nie dadelik verloor nie. Dalk het jy in jou lewe al soveel keer dieet, gewig verloor, verkeerde eetpatrone gevolg, weer opgetel. Dit laat sy merk en moet eers weer reggestel word.

Atkins se boek is ‘n baie praktiese boek. Dit is geskryf in ‘n baie gemaklike trant en lekker om te lees.

Kyk gerus HIER indien u meer van my skrywes oor die keto-leefstyl wil lees.

Ek wil jou graag uitnooi om deel te word van ons Banting (Keto) whattsappgroep. Ons kommunikeer in Afrikaans. Ons indersteun en help mekaar om die leefstyl goed aan te pak.

Toortsie

Wat maak ons groep uniek?

Wat maak ons Keto gewigsverliesgroep uniek?

Wel, ons kommunikeer in Afrikaans.

Ons kommunikeer per Whattsapp Groep.

Ons het weeklikse inligtingsessies met nog baie inligting en raad en bystand tussenin.

Ons lede ken nie mekaar noodwendig in persoon nie, en geen deelnemer weet hoeveel enige van die ander deelnemers weeg of hoeveel gewig hulle verloor het nie. Dít is konfidensiële inligting wat tussen die groepleier en groeplid persoonlik gedeel word.

Ons ondersteun mekaar, help mekaar en as iemand moedeloos voel of van die wa afgeval het, word hy liefdevol opgehelp en nie gestenig nie. Almal van ons weet hoe dit voel om soms die pad byster te raak of verlore te raak of te val. Ons glo dat dit nie saakmaak hoeveel keer jy val nie, maar hoeveel keer jy opstaan.

Ons volg die Keto (Banting) leefstyl en dit is waarop ons fokus: Om hierdie gesonde leefstyl aan te leer en vir die res van ons lewens daarby te hou.

Dit maak nie saak waar in die wêreld jy woon nie, jy kan deel wees van hierdie groep.

In ons groep geniet ons kos. Ons hou daarvan om daaroor te gesels en voel nie skuldig as ons eet nie, solank ons natuurlik die regte en toelaatbare kosse eet. Ons leer om anders te dink oor kos, dat kos ‘n wonderlike gawe is om te geniet.

Saam beveg ons ons oorgewig, diabetes en ander leefstylsiektes wat ontstaan het as gevolg van ons leefstyl van tevore.

Die groepleier is ‘n gekwalifiseerde Bantingafrigter.

Die groeplede sê:

Hierdie groep het heel eerste die regte en volhoubare eetplan. Ons leidster het ondervinding en ‘n hart wat omgee. Die groeplede is super ondersteunend. Die groep hou ons accountable.

Die groep hou my ook accountable. Ek het dit nodig. Ek is elke keer verbaas as ek dit regkry om nee te sê vir soetgoed en stysel. Ek kan dit nog nie glo ek kon so ‘n kopskuif maak nie.

Wat die groep anders maak is beslis die tiepe kos wat ons eet, die leidster wat die kennis het om ons op die regte manier te kan motiveer en omdat sy reeds en steeds die journey stap kan sy ons attent maak op die slaggate. Hier was nog nooit ‘n harde woord of teregwysings nie. Reghelp word in liefde en deernis gedoen. Ons almal besef ons het ‘n verslawing van een of ander vorm en wil dit oorwin en dis hoekom dit werk. Ons is ‘n AA vir wat jou poison ookal is.

Wat hierdie groep vir my suksesvol maak is: die eetplan bestaan uit gewone kosse. Ons kry ongelooflike raad en leiding. Ons vordering word gemonitor. Dit is vir my ‘n wenresep! Dankbaar om deel hiervan te wees en my eetgewoontes te verander!

Jy kan ook deel word van hierdie groep.

Kyk gerus HIER indien u meer van my skrywes oor die keto-leefstyl wil lees.

Toortsie

Verslawing

Verslawing is iets waarin ek baie belangstel oor persoonlike redes en waaroor ek al baie geskryf het. Dit is juis met my betrokkenheid by ‘n persoon in rehabilitasie wat ek seker een van die insiggewendste praatjies (lesings) denkbaar gehoor het.

Dit was daardie dag wat ek besef het dat ek ook tekens van verslawing toon. Ek is seker dat as iemand op daardie stadium gekyk het na die hoeveeheid Eglonyl wat ek gedink het, hulle net hulle kop sou skud en gesê het dat ek so min daarvan drink. Dat dit veilig is. Maar omdat ek eerlik daaroor was, het ek besef dat ek stadig, maar seker besig was om meer en meer daarvan te drink en net daar besluit om dit te staak. Dit was ‘n moeilike proses om heeltemal daarvan los te kom, maar ek kon dit doen omdat die Here my betyds gewaarsku en my gehelp het. Dit was ook tóé wat ek besef het dat ek aan kos verslaaf is, iets wat nog op daardie stadium glad nie erken was nie en wat mense gedink het ‘n grap was as jy dit sou noem.

Bitten Jonnson was een van die sprekers by die World Nutrition Summit 2022. Sy is ‘n gekwalifiseerde verpleegster en ‘n verslawingskenner. Sy werk met alle tipes verslawings, maar meer spesifiek suiker- en meelverslawing vir meer as 27 jaar.

Sy sê: Verslawing is ‘n siekte van die brein. Dat daar geen verskil is in die tipes verslawing nie. Verslawing is ‘n Primêre, Progressiewe, Kroniese, Dodelike, BEHANDELBARE siekte. Pille en operasies is nie die oplossing nie, jy moet die BREIN herstel.

Dit is ‘n herhalende, terugkerende siekte. Daarom moet ons HULPMIDDELS (TOOLS) kry om die siekte te hanteer. Verslawing begin by SUIKER … dan sigarette … dan alkohol … dan … dan … dan … (Die ergste is, ONS VOER DAARDIE SUIKER VIR ONS KINDERS!) Die siekte begin al baie vroeg in ‘n kind se lewe.

Dit gaan nie oor die DRUG of PROSES nie, maar oor die BREIN. Mense probeer so baie dinge – diete, enigeiets. Al daardie goed wat jy probeer, wys dat jy einlik ‘n sterk persoon is. Ons kan nie altyd help dat ons verslaaf raak nie, MAAR ONS KAN WERK AAN ONS HERSTEL.

DENIAL (Ontkenning) is GROOT.

Die eerste tekens van verslawing begin reeds by 5 – 6 jaar oud. Ons ONTKEN dat daar ‘n probleem is. Solank jy jou verslawing iets anders noem, kan jy NIE met herstel begin nie.

Ons raak ENSLAVED – dis die DRUG wat jou lewe wil beheer. Deur inligting en kennis hiervan, kan jy bevry word. As kind was jy ‘n soettand. As tienber begin jy dieet, raak anoreksies om die ‘cravings’ te probeer beheer. Dan, wanneer jy nie kan nie, ooreet jy jou. Op die ou end raak jy oorgewig.

So baie van die ander siektes wat ons kry, is eintlik maar ‘n reaksie op die verslawing.

Dan sluit sy haar lesing af: Die Keto (Banting) dieet is ‘n goeie keuse in die proses van herstel, die vry word.

Kyk gerus HIER indien u meer van my skrywes oor die keto-leefstyl wil lees.

Toortsie

%d bloggers like this: